পুৱতি নিশাৰ চিন্তা : হাইৱে

  

   চিন্তাৰ টুকুৰা - ১

   ইয়াত কালি কুকুৰটো আধামৰা হৈ পৰি আছিল,

   তেজেৰে তুম্‌ৰলি হৈ ।

   আজি তাৰ পেটটোৰ আধা নাই,

   গাড়ীৰ চকাত গ’ল।

   মোৰ নাক বন্ধ চল্লিশ চেকেণ্ড ৷

   সকলোৰে বন্ধ,

   সকলো নিমাত,

   যেন কাঁহ পৰি জীণ গ’ল !

   কাইলৈ বাকীখিনিও চকাৰ তলতে যাব ৷

   নাক বন্ধ কৰি‍ ৰাখিম চল্লিশ চেকেণ্ড

   পৰহিলৈহে‍ নাকৰ পৰা হাতবোৰ আঁতৰিব !

         

   চিন্তাৰ টুকুৰা  - ২

   তথাপি আমিবোৰ ব্যস্ত...

   চল্লিশ চেকেণ্ডলৈহে আমাৰ মানৱতাই সাৰ পায় ৷

   তাৰ পিছত কাইলৈ নোহোৱালৈকে‍ তাক ছুটী দিওঁ এদিনলৈ

   আমি আকৌ হৈ পৰোঁ যন্ত্ৰ ৷
   নাকত হাত থৈয়ে পাৰ হৈ যাওঁ মানৱতাক গচকি !

   হয়তো ছালডোখৰ তাত পৰি থাকি নিঃশেষ হোৱাৰ আগতেই

   আমি পাহৰি যাম -

   কেঁচা মাংস পচিলে কেনেকুবা গোন্ধ ওলায় !

  

   চিন্তাৰ টুকুৰা - ৩

   ইয়াত মৰেই-

   কুকুৰ, গৰু, ছাগলী…

   আৰু মানুহো মৰে , কেতিয়াবা ‘ব্ৰেকিং নিউজ’ হয় ৷

   কাৰোবাৰ ঘৰত চৌকা নুমায়,

   শোকৰ নদী বয়।

   সভ্যতাৰ একবিংশ শতিকাত

   আমি মাটি নহয় ……. মানুহ হোৱাৰহে‍ প্ৰয়োজন !

   চিন্তাৰ টুকুৰা - ৪

   
   ঠাইডোখৰ হেনো বিপদজনক...

   প্ৰায়েই দুৰ্ঘটনা ঘটে ৷

   নিউজত প্ৰায়েই ওলায় এই ঠাইডোখৰৰ কথা ৷

   মাজে মাজে কোনো একোটা ‘নিউজ চেনেল’ত

   ‘ব্ৰেকিং নিউজ’ দিয়ে কোনোবা ঢুকোৱাৰ ৷      

   লগতে ক’বলৈ নাপাহৰে -

   ঠাইডোখৰ হেনো আপদীয়া,

   কিবা ভূত-প্ৰেতৰ ছায়া আছে হেনো... !

   চৰকাৰে আঁৰি থোৱা চাইনব’ৰ্ডখনলৈ কাৰো চকু নাযায়....

   চাইনব’ৰ্ড পঢ়িবলৈ আমাৰ সময়েই বা ক'ত !

   ব্ৰেক মাৰি গাড়ীখন ধীৰ কৰিবলৈকে আমাৰ সময় নাই

   অথচ... চাইনব’ৰ্ডখনত এতিয়াও এতৰপ ধূলিৰ তলত শুই আছে,

   ইংৰাজীৰ শব্দ কেইটা ৷

   সকোলোৰেই দৃষ্টিৰ অগোচৰত -

   “Accident Prone Area, Please Drive Slowly.”

   চিন্তাৰ টুকুৰা – ৫

   এদিন ময়ো হয়তো হেৰাই যাম এই পৃথিৱীৰ পৰা,

   এই নশ্বৰ দেহটো হ’ব মাটি ….. ৷

   আজি কালি পিছে বজাৰত মাটিৰ দাম চৰা,

   মাটিৰ নামত ৰাজনীতিত চলিছে গৰম বতাহ ৷

   পাৰিলে মোক তোমালোকে মাটি হ’বলৈ‍ নিদিবা...

   য’ত মাটিৰে গঢ়া পুতলালৈ‍ মানৱতা নাথাকে

   সভ্যতাৰ একবিংশ শতিকাত

   আমি মাটি নহয় ……. মানুহ হোৱাৰহে‍ প্ৰয়োজন !

                              

                    *  *  *  *
    নৱজিৎ কলিতা

SHARE THIS