 |
| ব'হাগ |
ব'হাগ আকৌ আহিছে
অসমীয়াৰ মনত
অসমীয়াৰ প্ৰাণত
থৌকি-বাথৌ লগোৱা ব'হাগ!
আঁহতৰ তলত জুৰীয়া পেঁপাটি বাজিলেই
"গচকত ভাঙি যাওঁ যঁতৰ"-
গাভৰুহঁত
ঢুলীয়াৰ ঢোলৰ চাপৰত
ৰচকী পখিলা হৈ ঘূৰাৰ সময়৷
সূতাৰ টাকুৰীটো এইকেইদিন বৰকৈ ঘূৰিছে,
চেনেহৰ বিহুৱানখন সযতনে বৈছে
মনৰ মানুহজন কোন সময়ত আহি ওলায়?
উগুল-থুগুল মন,
বাৰেপতি চকু যায় পদূলিমুখলৈ,
মাকোঁ সৰে সঘনে৷
কুলিজনীৰ সুৱদী গীতত হিয়া শাঁত পৰি ৰয়;
ঢেকীৰ ঢমঢমনিত সাৰ পায় চৌপাশ
আখলত বিবিধ জুুতি
জলপান, পিঠা, লাৰুৰ!
বনগীত একোফাঁকি সৰি পৰে
ডেকাটিৰ ওঁঠৰ ফাঁকেৰে
পানী অনা গাভৰুজাক দেখি৷
সকলোতে উলাহৰ ঢল
ন-বাৰিষাৰ ন-ঢল নামে প্ৰকৃতিলৈ
কপৌফুলে হাঁহে নাচনীৰ খোপালৈ চাই
প্ৰগতি গগৈ
0 Please Share a Your Opinion.: